每月彙整:七月 2016

用WhatsApp LINE講電話 電磁波升6萬倍? (蘋果日報 10/7/2016)

手機通訊app都有通話功能,包括WhatsApp、LINE,喺海外可以免費打電話畀屋企人,慳好多電話費,但有時唔一定打長途,朋友會錯手打WhatsApp電話畀你,又或者有啲人覺得用WhatsApp被截聽機會細啲...(你唔係以為香港冇電話竊聽呀嘛)。 不過,最近網絡尤其台灣流傳「通訊軟體打電話 電磁波瞬間飆高6萬倍!」,當地東森新聞【網事有影嘸】仲搵專家做測試,發現手機備用時,電磁波係320微瓦,普通打電話升到最高9.2萬微瓦,但用Line打電話,會狂升到32萬微瓦,係備用狀態嘅1,000倍。升6萬倍係流嘅?專家話未必,因為如喺辦公室、交通工具,好多人一齊用LINE打電話就有咁嘅可能。 其實2013年,台灣電磁輻射公害防治協會已經用三星、SONY、hTC、iPhone、SHARP等手機測試用LINE時產生嘅電磁波,發現用邊款手機,電磁波都係唔使手機時嘅5至6萬倍。協會話,據世衛調查約有3%至5%人,可能對電磁波敏感,會覺得攰、頭暈、耳鳴、失眠、頭痛等。如必須用軟件打電話,通話時間愈短愈好,最好用無線耳機,否則手機都要距離耳仔最少2cm。 當地台南大學生態科技學系教授兼主任鄭先祐話,用其他app如WhatsApp都係一樣,因手機訊號都會提升,希望令到app運行更順暢,所以電磁波就會升高。 手機電磁波係咪危害健康仲未有證據,但凡事適可而止,用手機講太耐電話都手軟頸痛啦。(喂呀,用手機睇埋呢篇先啦)

發表於 電磁波新聞 | 已標籤 , , , , , , , , , , , , , , | 迴響已關閉